Umsagnir

 28.07.2015

Vera heiti ég og stundaði ég nám við Menntaskólann að Laugarvatni á árunum 2010-2014. Á þeim árum var Sigurjón Mýrdal sá kennari sem kenndi mér og mínum bekk einna mest. Ég tók sex stærðfræði áfanga og þrjá eðlisfræði áfanga undir leiðsögn Sigurjóns. Sigurjón sýnir gríðarlega mikinn áhuga á starfi sínu og miðlar þeim áhuga til nemenda sinna. Sigurjón sinnir starfinu mjög vel og einkenndist kennsla hans af mikilli vandvirkni og skipulagningu. 

Vera Sigurðardóttir

 29.07.2015

Sigurjón er frábær kennari. Undir handleiðslu hans náði ég sterkum tökum á eðlisfræði og stærðfræði. Í gegnum unglingsárin þá bar ég að borði hans ótalmörg vandamál. Hann tók á móti þeim öllum með stökustu ró og yfirvegun. Ég masaði um hvernig verkefnið væri óútreiknanlegt. Hann hlustaði og horfði á rúðustrikað blaðið, afmyndað af blýi og strokleðri. Hugsaði sig um í örfá andartök, og leiddi mig svo skref fyrir skref í gegnum verkefnið. Undir lokin, þá var það ekki lengur flókið. 

Ég mæli því heilshugar með honum í allri kennslu. Hann reyndist mér mjög vel í gegnum menntaskólaárin. Ég er ekki einn á þeirri skoðun. Þeir vinir mínir sem stunda raungreinanám í háskóla segjast hafa forskot á samnemendur sína, í þessum grunnfögum. Í þeirra umræðu ber nafn Sigurjóns einatt mest á góma. 

Guðmundur Snæbjörnsson

27.08.2015

Sigurjón er einstakur kennari sem vert er að vera í kringum. Hann leggur sig allan fram við að hjálpa þér að skilja námsefnið af sinni bestu getu. Stærðfræði er hans ástríða. Metnaðurinn skín í gegn. Þegar ég mætti til hans í stærðfræði fyrsta árið mitt í menntaskóla hafði ég lítinn skilning á stærðfræði. Sigurjón gjörbreytti sýn minni þar, sem og í öðrum raungreinum. Það sem ég lærði af honum mun klárlega koma til með að gagnast mér í framtíðinni. Ef þú ert tilbúin/n að leggja þig fram og sýna efninu áhuga er Sigurjón kennari fyrir þig.

Lilja Rós Sigurðardóttir

 29.07.2015

Sigurjón Mýrdal hefur kennt mér stærðfræði og eðlisfræði síðustu þrjá vetur. Mér hefur gengið mjög vel í þessum greinum og líkar vel við kennsluna hjá honum. Hann gerir kröfur og fer ýtarlega í efnið. Markmið hans er ekki bara að nemendur geti reiknað tilsett dæmi, heldur að þeir skilji hvað þeir eru að gera. Ég mæli hiklaust með Sigurjóni sem kennara fyrir þá sem vilja ná betri skilningi í þessum fögum og eru tilbúnir til að stunda nám sitt af alvöru og metnaði.

Kjartan Helgason

19.08.2015

Þegar ég var nemandi við Menntaskólanum að Laugarvatni naut ég leiðsagnar Sigurjóns í stærðfræði og eðlisfræði. Þar kynntist ég honum bæði sem kennara í bekk sem og maður á mann. 

Sigurjón hefur yfirgripsmikla þekkingu á viðfangsefninu og mikla reynslu af kennslu. Hann skýrir dæmin vel og hefur mjög gott lag á að setja dæmin upp myndrænt svo nemendur eigi auðveldara með að sjá fyrir sér vandamálið sem leysa þarf. Þetta tel ég að hjálpi nemendum mikið við að öðlast skilning á stærðfræði. Í ofanálag er Sigurjón þægilegur í samskiptum og gott að ræða við hann um hin ýmsu málefni.

Holger Páll Sæmundsson

 14.08.2015

Ég heiti Salbjörg Ragna Sævarsdóttir og er 24 ára. Ég er á fjórða ári í Háskóla Íslands að læra að verða grunnskólakennari. Ég var í Menntaskólanum að Laugarvatni þar sem Sigurjón Mýrdal kenndi mér. Hann hefur mjög gott viðmót og það er þægilegt að tala við hann. Hann er yfirvegaður, rólegur og þolinmóður, fór vel yfir það efni og þær aðferðir sem fyrir lágu. Ef maður skildi ekki eitthvað þá fór hann aftur yfir það með ýtarlegri útskýringum og/eða annari nálgun þangað til að maður áttaði sig á því. Hann gaf sér alltaf tíma til að fara vel yfir efnið, með nákvæmum og góðum útskýringum sem varð til þess að maður náði tökum á efninu og var alltaf með á nótunum hvað væri í gangi. Sigurjón er góður kennari, býr yfir mikilli þekkingu og á auðvelt með að miðla henni áfram til nemenda sinna.

 03.08.2015

Þó að maður hafi oft ekki tíma fyrir námið á menntaskólaárunum var ég fljótur að finna að Sigurjón er afbragðskennari. Hann er alltaf rólegur og þó maður sé stressaður hefur Sigurjón gott lag á því að hjálpa manni að koma auga á hlutina sem skipta máli í námsefninu og skýra námsefnið fyrir manni. Hann er alltaf tilbúinn að hjálpa þegar mann vantar aðstoð. Ég er nýútskrifaður með B.Sc. í vélaverkfræði frá Háskólanum í Reykjavík og ég er handviss um að ef ekki væri fyrir frábæran grunn frá Sigurjóni í eðlisfræði og stærðfræði hefði mér ekki gengið svona vel í háskólanámi.

Héðinn Hauksson  

 07.08.2015

25 ára Reykvíkingur, nýútskrifaður geislafræðingur úr HÍ. 

Sigurjón kenndi mér stærðfræði og eðlisfræði þegar ég var í Menntaskólanum á Laugarvatni. Hann kenndi mér eiginlega allt sem ég kann í eðlisfræði og áhugi hans á raunvísindum smitaðist oft út til nemenda. Þægilegt viðmót er mikilvægt til þess að vera kennari og var kennslustofa Sigurjóns alltaf vinsamlegur staður. Ég mæli eindregið með Sigurjóni sem kennara og hefði viljað að hann kenndi mér áfram í háskóla. 

Björk Baldursdóttir

 27.07.2015

Sigurjón hefur einstakt lag á stærðfræðikennslu og telst án efa með bestu stærðfræðikennurum sem ég hef nokkurn tíma haft. Fyrir utan gríðarlega þekkingu og reynslu á sínu sviði eru kennsluhættir hans fagmannlegir, nákvæmir og skemmtilegir. Hann vekur áhuga á námsefninu og fer ýtarlega og vel í gegnum það, með góðum útskýringum og skemmtilegum vangaveltum. Í  menntaskólanámi mínu hjá Sigurjóni öðlaðist ég til að mynda betri sýn á stærðfræði í heild sinni, hvað hún er og til hvers hún er. Fyrir tilstuðlan góðrar leiðsagnar Sigurjóns óx áhugi minn á stærðfræðinni, samhliða því að skilningur minn á greininni færðist í aukana og varð til þess að ég get nú auðveldlega sinnt mínu námi á sjálfstæðan og árangursríkan hátt. Ég mæli eindregið með einkakennslu Sigurjóns.

-Teitur Sævarsson

 27.07.2015

Stærðfræðin er nú kannski ekki mitt sterkasta fag og þótti mér því afar erfitt að skilja Sigurjón til að byrja með. Hans kunnátta var svo mikil að ég skildi oft hvorki upp né niður, en um leið og ég lærði inná hann og hans aðferðir sá ég að hann vissi nákvæmlega hvað hann var að gera. Hann leggur mikla áherslu á að maður skilji og skynji formúlur frekar en að notast við minnis aðferðir. 

Sigurjón er hörku stærðfræðikennari með mikla reynslu og kunnáttu í sínu fagi.

Hróðný Jónsdóttir

 26.07.2015

Ég heiti Guðrún Linda Sveinsdóttir og ég kláraði Menntaskólann að Laugarvatni vorið 2011. Ég fékk góðan grunn þar að mínu háskólanámi en ég stunda nám við Lyfjafræðideild Háskóla Íslands og hyggst klára masterspróf í þeim fræðum næstkomandi vor. Þar skal hafa góðan grunn í raunvísindum sem ég tel mig hafa haft frá Laugarvatni.

Sigurjón Mýrdal var einn kennaranna á Laugarvatni og kenndi hann mér flestalla stærðfræði áfangana og alla fjóra eðlisfræði áfangana. Sigurjón er góður kennari og hann bar alltaf hag okkar nemenda í brjósti sér. Hann vildi alltaf að við skildum námsefnið, þeysti ekki bara yfir kaflana eins og sumir kennarar gera, og gafst ekki upp heldur lét hann okkur alltaf skilja námsefnið áður en hann hélt í næsta efni. Það einkenndi Sigurjón, hann fór á okkar hraða og fór þá frekar hraðar yfir það sem við skildum vel og hægar í það sem við þurftum meiri hjálp með og útskírði vel og djúpt það sem þurfti til að nemendur öðluðust skilning. Ég hefði ekki minn grunn í stærðfræði og eðlisfræði ef ég hefði ekki haft góðan kennara.

Guðrún Linda Sveinsdóttir

 27.07.2015

Ég er fyrrum nemandi við Menntaskólann að Laugarvatni og kenndi Sigurjón mér öll fjögur árin stærðfræði og eðlisfræði. Stærðfræðikennsla hans var krefjandi og góður undirbúningur fyrir áframhaldandi nám. Ég útskrifaðist af náttúrufræðibraut árið 2014.

Í dag er ég að læra Rekstrarverkfræði við Háskólann í Reykjavík og hef nú þegar lokið við eitt ár. Ég er ánægð með að hafa hlotið kennslu undir leiðsögn Sigurjóns í stærðfræði þar sem það hjálpaði mikið í háskólanum. Hann er ákveðinn og góður kennari sem vill hjálpa manni að ná sem bestum skilning á efninu. Hann hefur sjálfur mjög djúpan skilning á efninu og kennir manni mjög fræðilega um stærðfræði.

- Ástrún Svala Óskarsdóttir 

Heim